شوية حكي وحرية – مشفى ميداني

شوية حكي وحرية – مشفى ميداني
لحظات انسانية في مشفى ميداني .. تابعونا
لسماع الحلقة انقر زر التشغيل من فضلك، ويمكن إيقاف سماع بث إذاعة بلدنا العام من خلال نقر زر الإيقاف في مشغل
الإذاعة الأسود يسار الصفحة

بجو مليء بالسكون مع شوية حكي .. مزح .. ضحكة بسيطة أو حدا عم يشكي همو و يحكي يلي بقلبو ليلي جنبه من الموجودين
و الموجودين عم يسمعو و بجوز كتار المشغوليين ..
أنت روح غير ع جرح المصاب هنيك و انتي صار وقت دوا المصابة برجلها شوفيها ..
تعالي ساعديني بإحصاء القوائم للنواقص من الأدوية
أنت روح فتاح وريد و ركب السيروم .. و أنت و هو و هية .. و كل يوم هيك مع ذلك بسمة الأمل و التفاؤل و اليقين بالنصر بتلاقيها منورة وجوه الكل ..
بس فجأة !!
بتسمع صوت قذيفة أو صاروخ ما بيطلع ع لسانك غير قولة : الله أكبر على كل من طغى و تجبر
يا رب .. ما يكون تصاوب حدا .. يا رب الثبات و الصبر ..
بلحظات المشفى الميداني بيتعبى ناس ملطخة بدمها منها الجريح و منها الشهيد
ناس بريئة من أطفال و نساء و شيوخ و شباب ..
الكل خايف هنن و نحنا .. خايفيين نلاقي حدا من الغوالي بين المصابين أو الشهداء
بسوريا كلنا منكون مشروع شهيد و بأي لحظة ممكن نصير شهيد
فجأة !!
هاتوا جهاز الضغط و قيس النبض و شوف التنفس
استقر الوضع ؟! أما بدو عملية ؟!!
دكتور عظمية أو عصبية أما عينية ؟؟
يييييي عنا إصاب بالرأس خطيرة !! يا ربي شو نعمل ؟
بدنا دكتور عينية , وإلا بيستشهد المصاب ,
محمد أول مرة بمر عليه هيك حالة, بس الوضع كتير خطير ودكتور عينية ماضل بالبلد, ولبين مايجي الدكتور المصاب بيستشهد, محمد بقول بسم الله وبيلبس الكفوف وبيلعب دور الدكتور, وبيتوكل على رب العالمين, وبيعمل كل شي بيئدر عليه, محمد عمل اللي عليه بس المصاب استشهد وارتاح, ودكتورنا الجديد اكتسب خبرة جديدة بالشهيد,
وهون في صبية , كمان وضعها خطير كتييير مصابة برصاصة قناص بفكها بدنا دكتور سنان ونحنا مامنفهو بهيك شغلة بحكم أول مرة منشتغل هيك شغلة,ماصار إلا اتصلنا بالدكتور حالة طارئة, وبعد ما طلب ضمانات على حياتو دخلنا ع البلد المحاصرة .
بعد ساعة زمان وصل الدكتور الله يجزيه الخير عالمشفى الميداني بسلام الحمد لله وماصرلو شي منوووب منوب , بس للأسف مالحق الصبية, اللي كمان استشهدت وهي عم تستنا دكتور .
عنا أطباء كتير , ومن كل الاختصاصات , بس هالحكي كان زمان, هلأ يامنلاقي دكتور بئيان شوي ليتخرج أو مامنلائي دكتور منووب, الأطباء الشرفاء يلي حافظوا عالقسم قلال ، ومافي أكتر من المتدربين اللي حاملين مهمة الإسعاف والمعالجة ع كتافن رغم خبرتن القليلة بالطب.
وقت بيتعبى المشفى مرضى بتتأكد أنو ما عندنا أدوية كفاية و لا آلات تعقيم للأدوات
بدك تحدد زمرة المريض و تعرف اذا معو سكري مثلاً أو اي مرض تاني
شغلة مو سهلة إنك تكون مأمن عأرواح الناس و غير هيك ما معك غير أدوات بسيطة و فيك تقول بدائية
بتبلش تسمع صوت قذائف بشكل متتالي خلال دقائق بتبطل تسمع لأن يلي بتشوفه بخليك تفقد حواسك
و أي إحساس أو شعور من يلي عم بيصير حواليك, و ما بتشوف غير إنسان محتاجك و منتظر مساعدة منك
بتبلش محاولاتك توقف نزيف جرح و تضل عم نحاكي المصاب لحتى ما يفقد وعيه و اذا فقد وعيه بدك توعيه
و كتير أحياناً بتجي حالات متل أم و ولادها التنتين مصابين و عم تقلك ابني .. ابني .. و هي عم تصارع الموت
و الأب جنبك و شايف دموعه عمرته و ولاده
بهاللحظة ما فيك غير تبدى بالدعاء بقلبك لأن ما معنا غير الله ألف الحمد لله
و ما عنا غير شوية أدوية و معدات بسيطة وخبرة قليلىةو آلاف
من الجرحى بيصيروا شهداء, الله حب انو يخفف وجعون و من نهر الكوثر يروين
و جرحى بننجح بإنقاذون و الحياة بترجعلون
شغلنا بين شهيد و مشروع شهيد و إنسان نولد من جديد
معجزات بتصير معك جوا غرفة العمليات و ناس من إصابة طفيفة بتكون صارت بنعيم الجنات
هيك الحياة مع كل مولود بتلاقي مفقود هاد القضاء و القدر, والدكتور اللي طول العمر عم يتعلم بالطب يوم الحاجة طلع كمان مفقود, والحمد لله قدر يحافظ على حالو وفتح عيادة بمكان تاني وتابع حياتو بشكل طبيعي, بس حرام ع طول كان قلبو مع المصابن وعم يدعيلن
سبحانك ربي ما أغظم حكمتك ..

فريق العمل:

إعداد وتقديم: حرائر داريا

إخراج ومونتاج: إذاعة بلدنا

 

Mail Skype Soundcloud Vimeo YouTube

اشترك بنشرة بلدنا البريدية

ادخل بريدك الإلكتروني للاشتراك بالنشرة البريدية والحصول على تنبيهات بالمواضيع الجديدة للموقع.

انضم مع 9 مشتركين

شركاءنا

أخبار الشام آبونا يوميات سورية
%d مدونون معجبون بهذه: