أبو حدو حكواتي الشام – نصيحة أبو حدّو

أبو حدو حكواتي الشام – نصيحة أبو حدّو

تابعوا معنا حكاية المؤامرة العالمية مع الحكواتي .. نتمنى لكم طيب الاستماع

لسماع الحلقة انقر زر التشغيل من فضلك، ويمكن إيقاف سماع بث إذاعة بلدنا العام من خلال نقر زر الإيقاف في مشغل الإذاعة الأسود يسار الصفحة


فات أبو حدو اليوم عالقهوة متأخر
بارم بوزو شبر وشو ماعم يتفسر
و الحاضرين :شبك خير سلامتك أبو حدو ؟
أخد كل واحد كاسة شاي و تجمعوا حدو :
شو بدي أحكي ياجماعة ومن وين إبدا وشو بدي قول
المؤامرة المحبوكة على شعبنا البطل شي مو معقول
كلما بقول اليوم رح أكتب النهاية و حكاية النصر
بيرجع بينزعها بشي فصل خايس ساكن القصر
كل كم يوم بيحكل إجرامو بمجزرة من المجازر
البشر فوق بعض متل الجمعيات عمل المقابـر
عم يكمل مشروع السكن للشباب
بدل الباطنجية سلط شبيحة كـلاب
بدون موافقة حدا سجلّهون اكتـتاب
من كتر أسمائهون عجز أكبر كتــاب
الناس تعبت وملت وناس بالإكتئـاب
ربي يجعل من الحفرة يلي بالتراب
قصر بالجنة عند ربهم عالي الجناب
عرف العالم أنو الثورة العظيمة بثبات
صار يخلق حجج واهية كتير ومبررات
مرة توحيد معارضة ومرة بدهون مقايضة
مرة تشكيل مجلس وطني ومرة إئتلاف من قلب وطني
مرة رح يعطوا سلاح ومرة هالشي غير مباح
مرة ما في تدخل أجنباوي ومرة على شي ضربة ناوي
شوي تانية بيخافوا عالأقليات مع أن من دهر عايشين أخوات
وشوي بيخافوا من الحرب الطائفية
وبيمسكوا مسبحة بيقروا اللطيفية
مرة بيخوفوا من الإسلاميين أو بيسموهن جماعات متطرفين
قاعدة ونصرة والجولاني و هالحكي وهنن قاعدين مبسوطين
بيرجعوا بيقولوا أنو من الكيماوي خايفين
مع أنو ماترك سلاح مااستعملوا هاللعين
وعلى مهل ومبادرات و مبعوثيين أمميين
شي جامعة عربية وشي قوى غربية
وصار في للشعب السوري أصدقاء
بيجتمعوا كل مرة بدولة بشي لقاء
لايك متل أصدقاء الفيس بوك بيحطوه وأنت عم يلتعن أبوك
وعلى مساعدات إنسانية نصها مسروق سلموها للنظام
وشي لدول الجوار بالمخيمات شحدوا من ورا شعبنا تمام
وقسم منها عم يوصل عن طريق حنفية مي
عم تنسرق كلها بينقط منها للمحتـاج شوي
بطانيات وغذائيات وأدوية و كرفانات و ياخطي
كلوا كوم وقال شو : معدات الغير فتاكة كوم
مناظير ستر واقية واجهزة اتصال ع دوت كوم
يعني بس بتأخر أنو يوصل الموت عليك
ومابتعرف شو بينفجر قدامك أو حواليك
أو شو بينزل من السما براميل أو صواريخ بالستية
أوهاون أو قنابل عنقودية أو مسمارية أو إنشطارية
أو فراغية أو قذيفة من قاذف أو الأسلحة الكيماوية
عجبي من معدات غير فتاكة بعدوك
ومابترد الموت يلي جاية من عدو ك
صار هم الكل قتل سوريا والثورة العظيمة
ليتقاسمو الثروة والوطن بالطريقة اللئيمة
وليتهنا عدونا إسرائيل بحياتو دوم الكريمة
ومن عند و يباسة راس النظـام
شارك بالمؤامرة نفذها عالتمام
همو كرسيه بخير و الوطن ركام
أما شو ممانعة وشو مقاومة وشو صخام و قرف
ذكرني بالعاهرة لما بتلقي محاضرة عن الشرف
وهو من تحت الطاولة عم يقدم تنازلات
فدا الكرسي بس وعالعلن وزع وطنيات
وصفقات بيع عم تنكتب بالسر
من البترول وشعير وقطن والبُر
باع خير البلد لقدام لسنين وابن البلد جوعان مسكين
تعالوا ياولاد البلد ياوطنيين من معارضين و مغتربين
فوتوا عالمناطق المحررة لنتوحد و نحارب المحتليـن
لا تستنوا شي من حدا وإلنا ربنا واحد ناصر و معين
هي موتة وحدة يا بتكون بشرف أو بغربة متحسرين
أو منعيش بكرامة بوطن محرر وللتاريخ راسنا رافعين
هي نصيحة أبو حدو عند هالمسا للكل يا سورييــن
إيد الله مع الجماعة الأشراف وتصبحوا بخير أجمعين

 

فريق العمل :
اعداد بلال الشامي حكواتي الشام
وتقديم ومونتاج رامي درويش

صفحة البرنامج على فيس بوك

Mail Skype Soundcloud Vimeo YouTube

اشترك بنشرة بلدنا البريدية

ادخل بريدك الإلكتروني للاشتراك بالنشرة البريدية والحصول على تنبيهات بالمواضيع الجديدة للموقع.

انضم مع 9 مشتركين

شركاءنا

أخبار الشام آبونا يوميات سورية
%d مدونون معجبون بهذه: