أفعال الكرسي

أفعال الكرسي
بدي احكي انو بلدنا الوحيد يلي بيمتاز بكترت المناصب لهيك خفو شوي… وريتوا ألف مبروك هالكرسي
لسماع الحلقة انقر زر التشغيل من فضلك، ويمكن إيقاف سماع بث إذاعة بلدنا العام من خلال نقر زر الإيقاف في مشغل الإذاعة الأسود يسار الصفحة

الاسد حرامي
الاسد أتلنا
الأسد دمر بلدنا
الأسد خلانا غربا
الاسد شردنا
بس الأسد خلانا نحب بعض
ونخاف على بعض
ونحمي بعض
ونبدي ارواحنا على ارواح بعض

لما كنا نركد بين الحارات وورانا الامن
كان الشب ما يترك الشب
وكانت البنت تمسك البنت
وكنا حتى ندخل اي بيت بدون استأذان
واهل البيت يرحبوا فينا ويخبونا

هي هية الألفة
وهي المروءة اللي امتازت فيها اهل سوريا

كرمال هيك ياريت ما نرجع متل ما كنا قبل
نخون بعض
ونشتم بعض
ونكره بعض
والشاطر بدو مصلحتو بغض النظر اخ ولا صديق ولا قريب

خلونا هيك
خلو عقرب الساعة يوقف هون
وتكمل الساعة تمشي بوقتها لاسقاط النظام
ومو بس النظام
اي شي من اجبرنا عليه النظام لازم يسقط
وحتى انو يسقط هالحزن والخوف والرعب والرشوة والمحسوبيات وحتىىى

صفة الكره لازم تسقط
ويسقط الكرسي

هلئ شارفت ثورتنا على نهايتها
وكل مين عم بيدور على كرسي يقعد عليه
هاد بيئلك بدي امن حالي بوظيفة
وهاد بيئلك انا اشتغلت اكتر منك وبدي اخد حئي
وبهالطريقة منكون رجعنا لعهد الاسد
وصار بدنا ثورة لثورتنا

بدي احكي انو بلدنا الوحيد يلي بيمتاز بكترت المناصب
لهيك
خفو شوي
شاركو هالبلد حزنها
ضمدولها جراحها
امسحولها دمعتها
مو وئتها
كلو حيلائي محل يعد فيه
وكلو حيلائي كرسي يليئ فيه
احزاب
وجمعيات
ومجالس
وعسكري ومدني
كلووووو جاية
والكل حتجازيه هالبلد على شغلو
المنيح بياخد حقو
والعاطل بياخد اللي بيستاهلو
وبدي احكيلكم شي
انا بفتخر اني عملت شي لهالبلد
بس مو بالتكبر ولا بالتفاخر العلني
بيكفي انو الي الشرف شاركت بحماية هالبلد
بالكلمة
بالقلم
بالرصاص
وأهم شي
شاركت بالمحبة يلي توزعت على الشام واهل الشام
وكرمال عيونك يا شام الروح بترخص

خلونا نكمل بطريق الثورة للاخر
خلونا نكمل ونبني جسر المحبة
خولنا نجتمع على سفرة الكرامة
ونشبع حرية بدون مزاودات

البلد يلي ربت وكبرت وعلمت وحضت
هي ام للكل وبعمرو ما كان الو فضل الابن عالام
لهيك امك ثم امك ثم امك
وهلئ بلدك ثم بلدك ثم بلد
ثم الكرسي
وريتووووووووا الف مبروك هالكرسي

وصباحك ومساكي حر يا سوريا

 

فريق العمل:
إعداد وإخراج: Lazikani
ميكساج: بيان
تقديم: Areej Sham

Mail Skype Soundcloud Vimeo YouTube

اشترك بنشرة بلدنا البريدية

ادخل بريدك الإلكتروني للاشتراك بالنشرة البريدية والحصول على تنبيهات بالمواضيع الجديدة للموقع.

انضم مع 29٬796 مشترك

شركاءنا

أخبار الشام آبونا يوميات سورية
%d مدونون معجبون بهذه: