وراق الياسمين – إدارة الأزمات

وراق الياسمين – إدارة الأزمات
بهالحلقة رح نحكي عن أهم الإجراءات اللي ممكن نعملها لنحافظ على سلامتنا نحن وكل أهلنا وأحبابنا.. ولنحاول قدر الإمكان نخفف من الأضرار اللي ممكن تصيبنا مع زيادة العنف والإجرام من قبل النظام..
 

لسماع الحلقةانقر زر التشغيل من فضلك، ويمكن إيقاف سماع بث إذاعة بلدنا العام من خلال نقر زر الإيقاف في مشغل الإذاعة الأسود يسار الصفحة


اليوم حبت ياسمينتنا الشامية تفتح لنا ورقة جديدة من وراقها وتحكيلنا قصتها..
خافت .. وحكت بصوت عم يرجف..
عن قصف الطيران  .. والقناص اللي قاعد عالسطح ..
عن قذائف الهاون والمدفعية.. والقنابل العنقودية ..
عن الدم .. والدمع..
عن الجرح … والوجع..
عن الناس الهربانة من بيوتها ..وطالعة تحت القصف والنار ..
وهي عم تدعي يا رب .. يا جبار.. تخلصنا من هالمجرم بشار وعصابته..

ومع ازدياد العنف بالشام .. والقصف بقذائف الهاون ..
والتفجيرات .. وانتشار القناصة بأكتر من مكان..
صار لازم نحكي عن أهم الإجراءات اللي ممكن نعملها لنحافظ على سلامتنا نحن وكل أهلنا وأحبابنا.. ولنحاول قدر الإمكان نخفف من الأضرار اللي ممكن تصيبنا مع زيادة العنف والإجرام من قبل النظام..
رح نبدا بالحديث عن أهم الاستعدادات اللي ممكن ننفذها ببيتنا حتى لو كنا بمناطق هادئة نسبياً .. فهاد الشي ما بيمنع ناخد احتياطنا لأنو النظام ما عم يفرق بالقصف والتفجيرات بين منطقة والتانية ..
لذلك من المهم أنو نبدا:
1- نلصق زجاج الشبابيك بلاصق عريض على شكل حرف X على الأقل لحتى ما يوقع الزجاج علينا بحال صار قصف أو تفجير قريب منا.
3-  نعبي كمية كافية من المي تحسباً للقطع.
4- نشحن الموبايلات والأضواء القابلة للشحن .
5- نحضّر حقيبة فيها كل الوراق المهمّة: جوزات سفر، شهادات، أوراق ملكية..ومنخليها  بمتناول اليد في حال اضطرينا نطلع من البيت بسرعة.
6-  منجهز شنتابة سفر صغيرة لكل واحد بالعيلة ومنحط فيها شوية غيارات و تياب نظيفة وللأطفال منحط ورقة فيها إسمهم الثلاثي و عنوانهم و رقم هاتف أو صوره عن دفتر العائله.
_______________
ومن الضروري بهالأحوال الصعبة أنو نجهز الملجأ وهو عبارة عن القبو الموجود ببنايتنا
أو إذا ما كان في بالبناية قبو .. فهون منختار غرفة بالبيت تكون غميقة وبعيدة عن الشبابيك والشارع العام وقريبة من الحمام…
ومنجهز الملجأ بعد ما ننضفه منيح ونتأكد من خلوه من الحشرات والقوارض وكمان بعد ما نتأكد من مداخل ومخارج الهوا فيه بمجموعة من الأشياء الضرورية متل المونه و المواد الغذائيه
والمحارم والشمع والكبريت ومصابيح الجيب..
وكمان منجهز الحمام بالملجأ .. فإذا ما كان موجود فمنخصص أحد أركان الملجأ ومنعزله بساتر قماش أو ألواح خشبية ومنحفر حفرة غميقة لقضاء الحاجة ومنسكرها بلوح خشب أو منضطر لاستخدام ﺃكياس ﺍﻟﺒﻼستيك ﺍﻟﻤﻨﺎسبة ﺍﻟﺤﺠﻡ ﻟﻠﺘﻘﻴﺅ ﺃﻭ ﺍﻟﺘﺒﻭل ﻭﻏﻴﺭﻩ ..
مع تأمين المي الصالحة للشرب والاستعمال .
مع عدة إسعافات أولية كاملة بما فيها من أدويه مهدئة ومطهرات وقطن، وشاش، وكحول، ومرهم حروق، وسيرنغات … كلها لازم تكون مجهزة وموجودة بحال الضرورة..
ويفضّل لما يصير قصف أو اشتباكات ويضطر الأهالي أن ينزلوا على الملاجئ أنو كل عائلة تجيب معا إسفنجات للنوم وبطانيات ومخدات ..
وأنو ياخدو معهم  أهم الغراض الشخصية والمصاري والدهب ليحافظوا عليها من السرقة .
________________
أما  بالنسبة للتصرف الصح خلال القصف .. شو نعمل .. وشو نساوي حتى نتجنب الخطر..
هون لازم ننتبه  أنو ما نقرب من الفرندات والشبابك والأساطيح … ونحاول تكون حركتنا قليلة ويفضل عن طريق الزحف على الأرض خوفا من أي شظية أو إصابة ..
ونحاول قدر الإمكان نحافظ على الهدوء وعدم الارتباك و الفزع والخوف وخاصة أدام الأطفال….
كمان ممنوع استخدام المصاعد الكهربائية خوف تتعطل أو تنقطع الكهربا ونعلق فيها..
ومن المهم إذا كنا بالطريق وصار في قصف أنو نوقف السيارة ونطلع منها ونلجأ لأقرب مكان آمن… والمفروض نبعد عن المباني القديمة وأبراج التوتر العالي بهالحالة..
أما بالنسبة لقذائف الهاون فهون من المهم نعرف أنو أفضل طريقة لتقليل مخاطر الاصابة هي عدم وجودنا بمكان مكشوف، وإذا ما لقينا مكان لنتخبا فيه بسرعة فأحسن حل أنو نستلقي على الأرض  ونحاول نحمي راسنا بإيدينا لنقلل من احتمال الاصابة بالشظايا.
أاذا كنا بالبيت وصار قصف بالهاون فالأفضل ننزل للطوابق السفلية … ونتجنب الطوابق العالية قدر الإمكان….
و يستحسن نحط طناجر أو نرتدي خوذات على الرأس لتجنب الشظايا..
والواجب علينا بهالحالة أنو نبعد قناني الغاز وبراميل النفط عن الأماكن المكشوفة ونغطيها بشكل مناسب .. ونسكر جرات الغاز أو الفرن ونقطع الكهربا عن البيت تجنبا لحصول حريق نتيجة إحدى الشظايا..

كمان من المهم أنو نحضر مواد للاسعافات الأولية السريعة في حالة الاصابة.  وبعد ما يوقف القصف نتفقد الجيران اللي حوالينا لنساعدهم بحال أصيب حدا منهم..
ومن المهم إذا شفنا أي جسم مشبوه يعد القصف بالقذائف والصواريخ أنو ما نحاول نمسكه أو نفتحه أو نحركه لأنو ممكن يكون نوع من أنواع القنابل العنقودية وتنفجر بأي لحظة…
لذلك من المهم نبعد عنه ونحذر الناس من لمسه أو مسكه..
وإذا ما لقينا حدا من المختصين بتفكيك القنابل من الجيش الحر أنو نطمر هالقنبلة بأكوام من التراب والرمل .. وننتبه لموقعها ..
______________
هلأ مننتقل  لكيفية التعامل مع إطلاق النيران والقناصة..

وهون من المهم  نكشف مناطق القناصة بحال مشاهدتهم.. ونوضح مكانهم لسكان المنطقة حتى يتفادوهم..

ولما نسمع صوت رصاص مفروض ما نبقى واقفين بمكاننا..
بالعكس لازم نتحرك بسرعة وبطريقة متعرجة .. يمين وشمال حتى نتفادى الإصابة..
ونلاقي مكان نتخبى فيه متل حيط أو بناية أو صخرة ..
وإذا كنا عم نسوق السيارة فلازم نزيد سرعتنا  حتى يصير من الصعب إصابتنا..
ولإذا قدرنا نطلع من السيارة ونخليها ساتر بينا وبين مصدر إطلاق النار لتوفير حماية إضافية والاختباء.
__________________
ومن المهم والضرور بهالظروف الصعبة اللي عم نعيشها أنو  نتدرب وندرب عائلتنا وأصدقائنا وجيراننا على اجراءات السلامة ومبادئ الاسعافات الأولية أكثر من مرة..
حتى ما يصيبنا الارتباك وقت  سقوط القذائف أو حصول إصابة ما..

بالنسبة للجروح: ففي ملاحظات بسيطة..ولكنها هامة..

*مهما كان الجرح بسيط .. إذا أهملناه رح يلتهب ويتحول لإصابة بليغة..
*المفروض تطهير الجروح بالمطهرات (بوفيدون أو سافلون)..ونطهر الجرح دائماً من المركز باتجاه الخارج، وباتجاه واحد، لمرة واحدة بقطعة شاش.
*مهم كتير ما ننسى وضع مرهم مضاد حيوي أو بودرة يود قبل تضميد الجرح بالشاش.
*يستحسن تغيير الضماد كل 24 ساعة، وإن كان الجرح عم ينزّ كثيراً منغير الضماد كل 6 ساعات.
* في الجروح البليغة منتجنب لمس الجرح .. أو سحب الأجسام الغريبة العالقة بالجرح…. ومنتجنب تطهير الجرح..
منغلف الجرح بقماش نظيف ومننقل المصاب للطبيب بأسرع وقت…
ومن  العلامات على التهاب الجروح: احمرار، ألم، انتفاخ، حرارة موضعية، وهي تستدعي مراجعة الطبيب فوراً…

أما الحروق
فكلما زاد عمق الحرق ومساحته زادت المضاعفات و الخطورة..
وطرق إسعاف حرق الدرجة الثانية يللي بتتأثر فيه البشرة والأدمة
ومن علاماته: وجود فقاعات ( حويصلات ) و توذُّم تحت الجلد
فهون بيكون إسعافه بتبريده بالماء الجاري لفترة لا تقل عن 10دقائق
وبعدين منحط  مصل ملحي لمنع تشوه وشد الجلد
مع  تنشيف الجلد بلطف شديد وتطهير محيط الفقاعة .. وبعدها منقوم  بالتضميد باستعمال شاش خاص بالحروق..
وهون لازم نعرف أنو الفقاعات تحوي سائل عقيم يحمي المنطقة المحروقة من الإنتان لذلك يفضل عدم ثقبها , إلا في حال تواجدها على المفصل أو بقربه.
أما حرق الدرجة الثالثة اللي بيحدث تلف في كل طبقات الجلد قد تصل إلى العضلات والأعصاب و العظام..
ومن علاماته: لون الجلد أسود , وغياب الحس في منطقة الحرق بسبب تموت الأعصاب , مع ألم شديد على محيط منطقة الحرق , وتشوُّه ..
فإسعافه بتغليف مكان الحرق من دون ما نبرده أو نطهره .. مع نقل المصاب إلى المستشفى أو المشفى الميداني

أما المصاب بطلق ناري
فهون منحاول إبقاء المصاب ثابت قدر الإمكان حتى ما تتضاعف إصابته إلا إذا كنا بدنا ننقله لمكانٍ أكثر أمناً أو للوصول إلى المشفى..
بداية لازم نحدد إن كان المصاب واعي ولا فاقد للوعي ….
وبعدها منحاول تنبيه المصاب حتى ما يدخل بحالة فقدان الوعي التي من الممكن أن تزيد  حالته سوءاً
•    إذا كان يتنفس مع بذل جهد كبير لاستنشاق الهواء ويصدر أصواتاً غير طبيعية (سعال متكرر، بحة، شخير، خرير) فهاد يعني انسداداً جزئياً للمجاري التنفسية وهون منحاول نخليه يسعل ليطلع الجسم اللي عم يسد المجرى.
•    إذا كان يعاني من جروح في الوجه والفك ساعده على الجلوس والانحناء إلى الأمام لفتح المجال لخروج الدم .
•    إذا كان المصاب يفضل وضعاً معيناً ساعده عليه (إذا كان المصاب يفضل الجلوس مثلاً).
•    ومنتأكد من أن الملابس لا تعيق حركة الصدر والبطن.
•    إذا كان قد أصيب في صدره عندها يفضل أن يجلس بوضعية نصف جالس.
أما إيقاف النزيف:
•    ابحث عن مدخل ومخرج الرصاصة حيث غالباً يكون المخرج أكبر من المدخل.
•    النزف الداخلي وتمزق الأنسجة أكبر مما تراه عينك.
•    تجنب اختلاط أي جرح لديك بدماء المصاب.
•    لا تحاول أبدا نزع الرصاصة من مكانها أو تحريكها إن كانت ظاهرة لك.

 

فريق العمل:
إعداد: نوران شامية
ميكساج: عبير يوسف
تقديم: مالو، تووتي

برعاية:
تجمع بنات الشام

Mail Skype Soundcloud Vimeo YouTube

اشترك بنشرة بلدنا البريدية

ادخل بريدك الإلكتروني للاشتراك بالنشرة البريدية والحصول على تنبيهات بالمواضيع الجديدة للموقع.

انضم مع 9 مشتركين

شركاءنا

أخبار الشام آبونا يوميات سورية
%d مدونون معجبون بهذه: