شوية حكي وحرية – اصلاحات النظام

شوية حكي وحرية – اصلاحات النظام
حكاية وطن كان موعود بالاصلاحات
لسماع الحلقة انقر زر التشغيل من فضلك، ويمكن إيقاف سماع بث إذاعة بلدنا العام من خلال نقر زر الإيقاف في مشغل
الإذاعة الأسود يسار الصفحة


من كل بيت حكاية ومع كل قصة غصة سورية سورية يا احلى رواية ضمت قلوب الناس المليان و شوية حكي وحرية لح اسرد قصتك يا وطن لوصل الهدف الغاية ومن امثالك الشعبية المليانة ضحك وامل وحرية ومن بيت شئاع لبيت رقاع حكاياا الثورة من حرائر داريا
كأنك تعبان؟
وعن هالشي يلي عم يصير مانك رضيان

– لك فهموني كرمال الله يا أخوان
حكايتنا حكاية بلد
من اطهر البلدان شبابها متل البركان
و هالشباب حكاية من حكايات الزمان
اسطورة يحكي عنا إنس وجان

راحت ايام واجت ايام
وفجأة وبشرارة صغيرة صحينا ع ثورة بأرضك يا شام
والله و نزلت هالناس عالساحات قال شو

لينااااادوا بأسقاط النظام !!!؟

اسقااط نظام !!؟ (استنكار)

(استهزاء) نظام شو يا شباب روقوا شوي وخلوا القصة تنحل بسلام
شوية اصلاحات وترجعوا متل اول وتقولوا يا سلام

– يوم ويومين وشهر وشهرين وعشرة كمان
وماشفنا شي من إصلاحات هالفهمان

(جدّية)
لهون وبس
ماعاد فينا نصبر و نسكت
نحنا الشعب مابئى نخبي أو نكبت
والله نزلنا عالساحات
بعد ظلم ابن هالحاكم
وبعد ما نشر شبيحة راسمة ع إيديها جماجم
اللي عملوا عمايل مابيعملا الظالم
سلب ونهب وضرب
لا والأضرب من هيك نشروا حواجز بالريف وبالشام
وصارت عندهن هواية الذبح والإعدام
وطبعا ما كفاه المخزن بعد كل هالسنين و الايام
طلب مساعدة الجيران
(مع ضحكة استهزائية) حبايبو الصين وروسيا وإيران
عطوه مدافع وصواريخ لك وحتى بالطيران
ماترك شي إلا وجربو فينا وبأرضنا كمان.

– بس بهالثورة
شفنا نااااس اشكاااال والوان
وشفنا منن يلي بينشاف واللي مابينشاف

لك اااااخ
شوبدي احكي
طئيت
ماعاد فيني ضل خرسان
بدي احكي وفش خلئي وماعاد سئلان

اخي ابن بلدي
فهام علي انت بجوز ابنك بحضنك ودفيان
بس والله غيرك كتير قاعد بغرفتو بردان ومامعو حق بطانية اوحرام
وابنو من الثلج سئعان..
لك حتى الشتاء هالسنة علينا غضبان
طيب لا تئلي ماسمعت بقصة اللاجئ السوري بلبنان؟؟!
اوقصة النازح يلي تشرد وتاه بالبلدان
لا ومنجي نحنا منزيدا علي كمان
لك مانو طالب منك عطف ولامن التاني إحسان
يازلمة سمعني فهمني إذا محتاج خود حاجتك وازود كمان
والله الشغلة مو شطارة ولا مكسب
مابعرف ليش قلة الذوق صايرة ادمان؟؟
طيب فهمني بشوبالضبط طمعان؟؟
حاجتك بقى تلعن أخت هالثورة لوصلتك لهالحالة ولهالزمان
دخيلك بالله عشو أسفان
حابب اعترفلك بشي هي مو حكاية كان ياماكان
هي حكايتي وحكايتك وحكاية هاد العصر و هاد الزمان
وبدي وصلك انو لعم نعيشو مو بس بسبب ظلم السلطان لا هيك
بدك ماتواخذني إنت كتير غلطان
هاد كلو بسبب انفسنا كمان
يلي ماعملت بوصية المصطفى العدنان
و يلي بعدت كتير عن قصص وعبر وأوامر القرآن
أخي لا تقول…. تأخرت
رجاع لربك واعترف انك ندمان
وادعي  بالثبات للمجاهدين  الله يزيدهن إيمان
أخي رجاع ودعيلنا
بالنصر من عند الرحمن
وصدقني إذا صفيت قلوبنا وكانت ايدنا بأيدين بعض
رح نرجع بدمنا نعمر هالأوطان
ورح ترجع سوريا
ورح يرجع اسما بلاد الأمن والأمان

فريق العمل:

إعداد وتقديم: حرائر داريا

إخراج ومونتاج: إذاعة بلدنا

 

Mail Skype Soundcloud Vimeo YouTube

اشترك بنشرة بلدنا البريدية

ادخل بريدك الإلكتروني للاشتراك بالنشرة البريدية والحصول على تنبيهات بالمواضيع الجديدة للموقع.

انضم مع 9 مشتركين

شركاءنا

أخبار الشام آبونا يوميات سورية
%d مدونون معجبون بهذه: