شوية حكي وحرية – خيار وفؤوس الثورة

ايدي بأيدك نحن أخوة مو مهم شو معي ولا معك نحن كلنا واحد وهدفنا واحد الك مهمتك بالثورة والي مهتي خلينا نتساعد..الوطن بحاجة نكون مع بعض ول بعض .
شوية حكي وحرية

شوية حكي وحرية

لسماع الحلقة انقر زر التشغيل من فضلك، ويمكن إيقاف سماع بث إذاعة بلدنا العام من خلال نقر زر الإيقاف في مشغل
الإذاعة الأسود يسار الصفحة

عالموعد جينا ياأحباب نحكي ونفضفض نحكي رأي هاد وهاد …بثورتنا ثورة الكرامة ما في مجال للفخامة … ثورتنا ثورة شعب كبير صغير غني فقير ثورة طالب ثورة حق ثورة عالظلم والظالم
قبل الثورة كان في مقولة تقول ..
يلي معوش مايلزموش
معك قرش بتسوى قرش !!!
المشكلة الكبرى انو هل شي هاد استمر بالثورة لااااء  وأخذ أبعاد ثانية
يعني صار الفقير اذا بدو يكون ثائر لازم تقتصر مهمتو بشيل لافتة وبيرمي حجار على الأمن وقت يهجمو علمظاهرة
ووقت بلش التسلح صارت مهمتو بشيل السلاح والوقوف على خط الجبهة
والبرنس الغني يلي معو مصاري قاعد ورا لابتوبو بيفسبك وعامل تنسيقيات ولا تفكر تسألو شو عم تساوي شنو ما عندو وئت يرد عليك -_____-
وحتى لو كان الفقير عندو أفكار وأراء ماحدى بيسمعها لأنو اذا حكا بيكون تجاوز مهمتو بالثورة !!!
قبل الثورة كنا متفهمين هل شي لأنو معك قرش بتسوى قرش مامعك قرش مابتسوى شي بس ليش ليستمر هل شي بالثورة؟؟؟؟؟؟؟
ليش الناشط الهاي كلاس كلامو مسموع والناشط الفقير اكل هوا ووئت بيحكي بيتسكرو آدان الجميع شو يعني الفقير ما بيعرف يحكي؟؟؟ ولا خلص المصاري هية بتحكي وهية يلي بتطرح آراء ؟؟؟ا..
يعني الناشط الفقير مشان ينسمع رأيو لازم يصير معو مصاري هل الحكي يعني يابيترك الثورة وبيدور على شغل يصير معو من وراه مصاري,أو بدو يصير من لصوص الثورة وحراميتها ويصير معو مصاري وبينسمع رأيو بس بعد مايكون خسر حالو..
سنتين ثورة ولحد هلأ ماتغير شي لسا اللغة السائدة بين الناس لغة المادة ولسا يلي معوش مابيلزموش
!!!

ليش ليكون عنا هالتفكير؟؟ ليش ثورتنا مو ثورة عدل ومساواة وحرية الرأي والتعبير
مو ثورة شعب ضد التفكير الحيادي ثورة ضد المادية والتسلط؟؟
ولا بس بدنا نطلق صيحات عالفاضي ..!!! الغنى غنى النفس والأفكار غنى التفكير العادل … غنى الأخلاق
خود فكرتي وعطيني فكرتك وخلينا نرتب ابجدية أفكارنا خلي حروفنا تحكي آراءنا
ايدي بأيدك نحن أخوة مو مهم شو معي ولا معك نحن كلنا واحد وهدفنا واحد الك مهمتك بالثورة والي مهتي خلينا نتساعد
الوطن بحاجة نكون مع بعض ول بعض .
بحاجة كل واحد فينا
أنا وأنت وانتِ وهوو وهية .بحاجتنا كلنا
بتمنى تكون رسالتي وصلت ودخلت ع عقولكم قبل قلوبكم
بنهاية حلقتنا لليوم حرائر داريا بودعكم على امل نلتئي من جديد ..بودعكم على أمل النصر القريب

فريق العمل:

إعداد وتقديم: حرائر داريا

إخراج ومونتاج: إذاعة بلدنا

 

Mail Skype Soundcloud Vimeo YouTube

اشترك بنشرة بلدنا البريدية

ادخل بريدك الإلكتروني للاشتراك بالنشرة البريدية والحصول على تنبيهات بالمواضيع الجديدة للموقع.

انضم مع 29٬796 مشترك

شركاءنا

أخبار الشام آبونا يوميات سورية
%d مدونون معجبون بهذه: