أطفال الحرية أملنا – الانعكاسات النفسية والاجتماعية والمعرفية على الطفل

أطفال الحرية

أطفال الحرية

لسماع الحلقة انقر زر التشغيل من فضلك، ويمكن إيقاف سماع بث إذاعة بلدنا العام من خلال نقر زر الإيقاف في مشغل الإذاعة الأسود يسار الصفحة

بهالحلقة رح تسمعوا شرح مجمل الانعكاسات النفسية والاجتماعية والمعرفية على الطفل.. ورح نركز على آليات التعامل مع الطفل بحسب الأزمة النفسية المعرض إلها أو يلي موجودة عندو…

عناوين التواصل: atfalelhuriye@baladna.fm

إعداد وتقديم: D.SH.K

بدعم من مجلة جيل الحريّة… للحلم بقية: facebook.com/freedom.generation1

مرحبا من جديد بالحلقة التانية من برنامجنا .. أطفال الحرية .. أملنا ..

 بالحلقة الماضية عرفناكون على برنامجنا اللي بخص الدعم النفسي للاطفال وخصصنا للاطفال لانون الفئة الاضعف والاكتر عرضة للازمات النفسية وهيك بكون واجب علينا نهتم فيون ونحيطون بمزيد من العناية والرعاية ونأرشد الاهل لحتى يتعاملو معن بطريقة ايجابية باوقات النزاع المسلح والظروف الصعبة كمان حكينا كيف وليش بكون الاطفال ضحية بحالات النزاع المسلح والازمات..

اما بهالحلقة لح نشرح مجمل الانعكاسات النفسية والاجتماعية والمعرفية على الطفل .. ونفوكس على اليات التعامل مع الطفل بحسب الازمة النفسية المعرض الها او يلي موجودة عندو

وبما انو الاطفال هنن الضحية والاضعف بحالات النزاع المسلح لازم يزيد الاهل اهتمامون بطفلن ويقدمولو الرعاية يلي بتخلي يتخطى هالازمة اضافة انو لازم يخفو مشاعرون من قلق وخوف قدر الامكان وهالشي ما بدو غير شوية وعي وبرنامج منظم لحتى يتخطى الطفل هالازمات بشكل ايجابي وطبيعي وما يكون للصدمة اثار مستقبلية على حياتو

لح نحكي هلأ عن انعكاسات ظروف الحرب والازمات على الاطفال ..طبعا هالشي بيتأثر بمدى ادراك الطفل وعمره وخبراتو الماضية وهالانعكاسات مقسومة على تلت مجموعات:

اولها الانعكاسات النفسية والاجتماعية اللي بتمثل :

القلق النفسي يلي هوة حالة توتر ممزوج بخوف وفي نوعين للقلق

1 – قلق طبيعي : بينشأ لعارض طبيعي وبيختفي مع اختفاؤو

2 – قلق مرضي: بصاحبه امراض نفسية متل الوسواس القهري او يلي بصاحب بعض الامراض العقلية متل الفصام وهون منحتاج لمعالجة المرض الاصلي مو حالة القلق

ومنكتشف حالة القلق عند الطفل عن طريق الاعراض التالية:

متل انو بتزيد حركة الطفل بصير عندو ميلان اما للاكل الكتير او القليل ..بيشرد الطفل وما بقا يقدر يركز كتير. بعصب وبيبكي بسرعة … اضافة انو بتصيبو اضطرابات النوم وحالات الكوابيس والاحلام المزعجة

اما الاثار السلوكية للقلق بتضمن التمرد بفرض الراي على الاكبر منو كمان بصير بياكل اضافرو بسنانو وبسبب جو التوتر بتزيد نسبة العنف عند الطفل وبصير عدواني

وهل ألح نتعرف على مسببات حالات القلق عند الاطفال ويلي هية :

بشكل رئيسي هية فقدان الامن والامان المرتبط بالتهديد المستمر للطفل اذا ما عمل متل ما بدن اهلو كمان التعرض المستمر لمظاهر العنف والخوف والخطر ومتل ما منعرف انو الطفل بيتأثر باهلو بشكل مباشر فممكن تنتقل اثار القلق من الاهل للطفل

واذا حس الطفل بالوحدة وانو مافي حدا جنبو حيقلق ويخاف كمان اذا انكذب عليه وشاف الحقيقة بعينو ممكن ينصاب بالقلق

الناتج عن تشويه الحقائق

ومتل ما حكينا ممكن يصير عند الطفل اضطرابات بالنوم وخاصة باول تلت من الليل فبيفيق عم يصرخ ويبكي وخايف كتير وبصير بدو حدا يكون معول حتى ينام

واعراض هالاضطرابات هية انو بفيق الطفل بشكل متكرر بسبب الكوابيس المخيفة وبصير قلبو يدق بسرعة وتنفسو سريع كمان وبيعرق كتير وبتتطلب تهدئة الطفل وقت كبير لعدم استجابتو بسرعة لمحاولات اهلو

كمان ممكن يكتئب الطفل وقت يشوف مشاهد الدمار والموت او اذا شاف اهلو عم يصرخو وهاد اللي ممكن يكون عند الطفل صدمة نفسية

وبيبلش يظهر القلق عند الطفل عن طريق الاعراض التالية :

مزاج معكر طول الوقت وما بقا يهتم الطفل بشي ولا بيستمتع باللعب بيهمل نظافتو الشخصية و بصير بحب يضل لحالو

كمان ممكن ينزل وزن الطفل بشكل ملموس لانو ببطل ياكل منيح وما بقا بيثق بحدا وبصير عندو شعور بالذنب وعدم تركيز وممكن يفكر كتير بالموت او الانتحار

ولحتى نحنا نعالج اثار القلق واضطرابات النوم والاكتئاب ممكن نتبع الاليات التالية :

لازم نبعد الاطفال قدر الامكان عن مكان الخطر لحتى نأمن جو الامان والاستقرار ونحاول نحافظ على نشاطاتون اليومية الاعتيادية ونحاول نخلق بكل فراغ من الوقت نشاط ايجابي بديل

كمان لازم نتقبل ردود افعالون تجاه كل هالاحداث ونحكي معون عن الاوضاع ونسألون من شو خايفين ممكن نحكي تجارب اطفال تانية قدرو يتغلبو على هالصدمات بدون خوف

ولازم يتم تخفيف حدة التوتر والضغط النفسي عن طريق انشطة بدنية متل الالعاب والاغاني والقصص والرسم

واهم الشي انو نكلف الطفل بمهام صغيرة ليحس بقيمتو ووجودو

وهل ألح نتعرف عالانعكاسات المعرفية على شخصية الطفل

واولها واهمها هوة الكسل والفشل الدراسيبسبب انشغال ذهن الطفل بالاحداث حوليه

واكتر الاسباب يلي بتسبب الفشل الدراسي هية:

غياب الطفل المتكرر عن المدرسة بسبب الظروف السيئة اضافة لتدمير المدارس وقصفها بشكل جزئي او كلي

غياب الشعور بالامان بقلب المدرسة

واكتر الاطفال يلي بتتعرض لهلفشل هنن يلي بيعشو بالبيئات الفقيرة

اثار الفشل بتسبب هرب الطفل من المدرسة .. بجيب علامات سيئة بالاختبارات .. قلة الانتباه وقت الدروس … خلل بمفاهيم المعرفة عند الطفل وخاصة الامور المتعلقة بالحقوق والواجبات

منعالج حالات الفشل الدراسي عند الاطفال: عن طريق

تكثيف الانشطة يلي بتفرغ الطاقات بالمدرسة متل الرياضة والرسم والموسيقا كمان شي مهم متابعة الاهل للطفل بشكل مستمر

والاهم منذلك هوة نقل الطفل لمدرسة بعيد عن خطر القصف والحرب

الانعكاس المعرفي التاني هوة التشتت وعدم التركيز وقلة الانتباه اللي بينتج عن مشاهدة المناظر المخيفة والعنيفة بشكل مباشر وغير مباشر

اثارو : الذهول وبصير الطفل يسرح بشكل مستمر وما بيقدر يركز بموضوع واحد وبينسى كتير وما بقا يقدر يسترجع معلومات متل الاول

وعلاج قلة التركيز بكون بتوفير جو الراحة والامان ومنح الطفل الثقة وتوضيح الاحداث بشكل متناسب مع عمرو واهم الشي انو نحلي الطفل يحكي كل شي بشكل حر وتلقائي ليعبر يلي جواتو

اما الانعكاسات السلوكية بتتمثل بالعدوانية بسبب التعرض لمواقف العنف او مشاهدتها وهالشي بيولد عند الاطفال احباط وبزيد التوتر فبتنعكس هالامور سلوكهون وتفكيرون ومشاعرون

كيف ممكن نحد من هالعدوانية :

عن طريق تفعيل قدرات الطفل بنشاطات تفريغ الطاقة بقصص متل الرياضة .. التعلم باللعب..وورشات الرسم بشكل موجه لقدرات الاطفال

كمان لازم توعية الطفل عن طريق قصص بتعلمو انو هوة مسؤول عن قرارو ولازم يبقى الاهل جنب الطفل دائما وعلى تواصل معو ..

الانعكاس السلوكي الاخير هوة مص الاصابع: يلي بينتج عن صدمة فجائية للطفل بتسبب اضطراب نفسي

ولازم نعرف ليشب يلجأ الطفل لمص اصابعو لان هالشي بيعطي شعور بالراحة والدفء والشبع

شو يلي بخلي الطفل يمص اصبعتو؟ بيكون عندو حالة من هالحالات : ..جوع..نعس..خجل..وانزعاج

واكتر الاثار ضررا على الطفل بسبب مص اصبعتو هية تشويه الاسنان وصعوبة التفاعل الاجتماعي

واهم طرق علاج هالحلة هية:

تجاهل الاهل لهلقصة بحيث ما يعملو منها ضجة ومصيبة

كمان توفير الامان بخلي الطفل ياخد راحتو الكاملة بدون ما يحتاج ليمص اصبعو

وهيك بكون اتعرفنا عالانعكاسات السلوكية والنفسية والمعرفية بشكل واضح مع الاثاروالاعراض وطرق العلاج

ان شاء الله تستفادو من هالحلقة وتكونو استمتعتو فيها

وهلأ متل ما وعدناكون انو نسمعكون رأي طفل عايش هالاحداث

لح نطلعكون على  رأي زيد يلي بالصف الاول … طفل عايش بظل الثورة خلونا نسمع سوا شو كان رأيو J

  كانت معكون ديمة على اذاعة بلدنا اف ام

والى اللقاء الاسبوع الجاية بحلقة جديدة من برنامجنا … اطفال الحرية .. املنا

 

Mail Skype Soundcloud Vimeo YouTube

اشترك بنشرة بلدنا البريدية

ادخل بريدك الإلكتروني للاشتراك بالنشرة البريدية والحصول على تنبيهات بالمواضيع الجديدة للموقع.

انضم مع 9 مشتركين

شركاءنا

أخبار الشام آبونا يوميات سورية
%d مدونون معجبون بهذه: