شو بدي احكي؟

شو بدي احكي؟

خاص بلدنا

آلولنا مافي خير إلا ببلدنا… وفعلاً الخير ببلدنا!

شو بدي احكي؟
عن المطر؟… عن الحجر؟… عن رفة قلب مع كل وتر؟
عن صوت الأدان بالإيمرية؟ جماعة جاي من الأموي الكبير، واللا عن ريحة غنى بلادي على كتفو شوي بالبزورية؟

شو بدي احكي؟
عن ريحة الأرض بالغوطة واللا عن ترانيم رجالنا تحت شجرات كنوز بلدنا؟
واللا عن خفخة مياتنا النازلة من الشيخ وقاسيون وجبال المزة من الماضي

زيتات المعضمية؟ واللا سراجنا بإدلب العاطي… العاطي أملنا مع زهرات رمان الزاوية قهْر الأعادي

شو بدي احكي؟
عن رجفة جبل سمعان وأسوار قلعتها شهبا، ورجال بالسيوف الأماضي… وعن صخرات سمعان ومدن حياة الماضي.

بلدنا، والاسم ماضي… ماضي بشق الجاي من الإيام ع كتاف شبابنا وبناتنا… ع كفوف حملت ورقاتنا الخضرا وحبوب الدهب، متل ما حمل لبنان سناسل الفضة والعاصي ماضي.

شو بدي احكي؟
عن الناعورة تغني وتغرف بهالرأراء وتفرش بسطات الوادي… هالهادر الجبار بوش الأعادي، الرافع سيف بن الوليد باسم الله وماضي.

شو بدي احكي؟
عن حدود مالها حدود، مجبولة بالحلم والتاريخ، وفاتحا للعالم حضارة، من بلدنا أم الحضارة، على بساط من موج وحرية

شو بدي احكي؟
وعندي ببلدنا أغنى أرض جزيرة من جنان الرحمن وعز الماضي.
واللا سهلنا الرافع السما برجال حوران ونجمات غسان تضوي وتصرخ بعالي الصوت، يا الموت للعادي.

شو بدي احكي؟
لما تتسربل على خدودي أغادير من فرات الزور ورجولة زُعّام بلادي.
لما يندهني من قلب المهجور شموخ الصخور، واطلع وشوفها على تاج بلدنا، درة من هالزمان للزمن الماضي، أعجوبة الآرام وجنة الزباء، ست ملوك الماضي.

شو بدي احكي؟
عن شهامة رجال، هان عليهن الموت من ظلم ابن البلد العادي، وارتموا تحت بساط بلدنا وراحوا… لغيرن يرتاحوا
واستشهدوا ونادوا بلدنا… بلدنا أمانة بإيديكن يا ولاد بلدنا.. وأمانة علينا ما نتركها للأعادي.
الفاتحة لروح شهداء بلدنا

 

كتبها مؤنس بخاري – صوت بسمة المعضمية

Mail Skype Soundcloud Vimeo YouTube

اشترك بنشرة بلدنا البريدية

ادخل بريدك الإلكتروني للاشتراك بالنشرة البريدية والحصول على تنبيهات بالمواضيع الجديدة للموقع.

انضم مع 29٬796 مشترك

شركاءنا

أخبار الشام آبونا يوميات سورية
%d مدونون معجبون بهذه: